SeleksyonNasyonal

Ayè dimanch 11 janvye 2026 lan, jèn Grenadye yo fè yon match nil entèresan fas Aigle Noir AC, nan yon match k ap sèvi pou fè dènye mizanplas yo avan seleksyon an vwayaje nan peyi Kiraso kote gwoup Ayiti an ap jwe an.

Gras ak Kerdina Lamour ki se prensipal vedèt ekip sa, seleksyon nasyonal ayisyèn lan te reyisi jwenn ouvèti eskò an sou yon koufran dirèk nan premye mitan an. Aigle Noir AC, ki genyen nan efektif li plizyè jwez ki te nan dènye seleksyon jèn nou yo, te reyisi jwenn egalizasyon nan dezyèm mitan an.

Seleksyon nasyonal ayisyèn lan ki toujou poko ofisyèlman genyen antrenè, kontinye ap prepare sou tèren Parc Sainte-Claire lan nan Tiplas Kazo. Aprè 2 match preparasyon, Grenadye yo genyen yon bilan san viktwa, avèk yon nil epi yon defèt yo te fè nan premye match lan kont Dumornay FC.

N ap raple, Ayiti ap gen pou jwe nan dat 25, 27 ak 31 janvye youn aprè lòt kont Zile Kayiman, Sentlisi, Antigwa epi Gwatemala. Nan fòma konpetisyon sa, premye an ap kalifye dirèk pou dènye faz lan k ap fèt ak 12 ekip.

KÒMANTÈ

Dènye atik yo